प्रशांत पाटील यांची दूध संकलन क्षेत्रात नाबाद 31 वर्षे

सर्वाधिक व गुणवत्तापूर्ण दूध संकलनामुळे तालुक्यात गौरव

शिवतंत्र न्यूज 

     कुर्डू परिसरात सहकारी दूध संघाच्या माध्यमातून पुढे आलेल्या काही संस्था आजही अविरत कार्यरत आहेत. सहकारी दूध उत्पादक संघ बॅकफूटवर गेला असला तरी संस्थांचे पदाधिकाऱ्यांनी हा प्रवास अखंडपणे सुरू ठेवला आहे. कुर्डू परिसर हा धवल क्रांतीचे माहेरघर ठरला आहे. येथील प्रशांत पाटील हे गेले 31 वर्षांपासून या क्षेत्रात कार्यरत आहेत. विक्रमी व गुणवत्तापूर्ण दूध संकलनामुळे
बऱ्याच वेळा त्यांचा गौरव देखील झाला आहे.

25 ऑक्टोबर 1995 रोजी कै सर्जेराव (काका) पाटील सहकारी दूध संघाच्या माध्यमातून हा प्रवास सुरू झाला. सुरुवातीला फक्त दोनशे लिटर संकलन होत होते. मात्र प्रशांत पाटील यांनी दूध उत्पादकांना प्रोत्साहन देत तसेच दूध उत्पादकांना नवीन गाई खरेदीसाठी आर्थिक मदत उपलब्ध करून दिल्यामुळे प्रतिदिन दुधात वाढ होऊ लागली. काही दिवसात हजाराचा टप्पा पार पडला. वर्षानुवर्षे यामध्ये वाढ होत राहीली. काही दिवसात प्रतिदिन 3900 लिटर एवढे संकलन प्रशांत पाटील यांच्याकडे होऊ लागले. त्यांच्या या यशाची कामगिरीची तालुका स्तरावर दखल घेतली गेली. सुरुवातीला 1998 मध्ये आणि नंतर 2007 मध्ये तब्बल दोन वेळा सर्वाधिक दूध संकलनासाठी तालुका स्तरावर द्वितीय क्रमांकाचा पुरस्कार देऊन प्रशांत पाटील यांना गौरवण्यात आले. जिल्हा दूध संघाची घौडदौड वेगाने सुरू असताना विविध बहुराष्ट्रीय दूध कंपन्यांनी भारतीय बाजारपेठेत प्रवेश केला. दुधाची विभागणी झाली. विविध खासगी कंपनी जादा दर देऊ लागल्याने दुधाचे विभाजन झाले. जो जास्त दर देईल तिकडे दूध उत्पादक दूध देऊ लागले . त्यामुळे जिल्हा दूध संघ मोडकळीस आला. प्रशांत पाटील यांनी या परिस्थितीत वाटचाल सुरू ठेवली आणि दूध उत्पादकांना जास्तीत जास्त दर मिळेल तेथे दूध देण्यास त्यांनी सुरुवात केली. आजही प्रतिदीन 1000 लिटर दूध संकलन प्रशांत पाटील यांच्या संकलन केंद्रावर होते. दूध संकलनाबरोबरच उत्तम दर्जाचे पशुखाद्य देखील ते विक्री करतात बारामतीतील कॅटल फीड चे इंद्रनील हे पशुखाद्य ,सरकी, शेंगदाणा पेंड आदी पशुखाद्य त्यांच्या संकलन केंद्रावर उपलब्ध असते.

शेतकऱ्यांनी कष्टाने उत्पादित केलेल्या दुधाला योग्य दर मिळाला पाहिजे या भूमिकेतून आपण व्यवसाय केला. कै सर्जेराव काका पाटील दूध संकलन हे तालुक्यातील तिसरे केंद्र होते ज्या ठिकाणी इलेक्ट्रॉनिक वजन काट्याचा वापर सुरुवातीपासून होत आहे .तसेच दूध उत्पादकांना दहा दिवस घातलेल्या दुधाची छापील पावती सुद्धा येथे देण्यास प्रशांत पाटील यांनी सुरुवात केली. दूध उत्पादकांनी घातलेल्या दुधाचे रजिस्टर, पगार रजिस्टर , ऍडव्हान्स रजिस्टर आदी त्यांनी काळजीपूर्वक जतन केले आहे. कितीही वर्षापूर्वीची माहिती आपणाकडे मिळू शकेल असेही ते सांगतात. दूध उत्पादकांची फसवणूक होणार नाही अशाच प्रकारे आपण व्यवसाय केल्यामुळेच अविरतपणे 31 वर्षे आपण हा व्यवसाय करू शकलो असे ते म्हणतात शेतकऱ्यांना गाय खरेदीसाठी संपूर्ण गाईचे रक्कम डेअरीमार्फत दिली जाते. एकंदरीतच सर्वच कुर्डू परिसरातील दूध डेअरी या अशा प्रकारची सुविधा देतात असेही त्यांनी सांगितले.

प्रशांत यांना दोन मुले आहेत. मोठा मुलगा सूर्यतेज हा सीए करत आहे तर लहान उदयसिंह याचे एमबीबीएस पूर्ण होत आहे. मुलांच्या शिक्षणामुळेच या व्यवसायात चार पाच वर्षात फारशी वाढ झाली नाही. मात्र लवकरच मोठ्या जोमाने आपण पूर्वीसारखीच घोडदोड करणार असल्याचा मनोदयही त्यांनी बोलून दाखवला. भविष्यकाळातील दूध व्यवसाय कसा असावा याबाबत ते सांगतात की आता आत्याधुनिक पद्धतीने दूध उत्पादकांना दूध उत्पादन करावे लागेल. वेग वेगळ्या सॉफ्टवेअरच्या माध्यमातून जास्तीत जास्त गाईंचे व्यवस्थापन करता येते. डॉक्टर मदने यांच्यासारखे काही तज्ञ डॉक्टर आहेत ज्यांनी या क्षेत्रात संशोधन केले आहे त्यांची प्रेरणा आपण घेतली पाहिजे. अत्याधुनिक सुविधा आपल्याकडून उत्पादकांना मिळाव्यात ज्याच्या माध्यमातून दूध उत्पादनात वाढ होईल यासाठी आपण प्रयत्न करत असल्याचेही त्यांनी सांगितले. दूध उत्पादन क्षेत्रात मोठी संधी आहे. कुर्डू परिसरातून 25000 लिटर दूध दररोज उत्पादित होते ही खरोखरच अभिमानाची गोष्ट आहे. आधुनिक तंत्रज्ञानाचा वापर केल्यास यामध्ये आणखी वाढ शक्य असल्याचे ते सांगतात.

कष्ट, प्रामाणिकपणा व सातत्याच्या जोरावर दूध संकलन क्षेत्रात तब्बल 31 वर्ष पूर्ण केलेल्या प्रशांत पाटील यांच्या प्रेरणेतून दूध उत्पादक, व्यावसायिक प्रेरणा घेतील अशी आशा आहे.